ស្ត្រីជនភៀសខ្លួនខ្មែរ​ នៅក្នុងរូបថតដ៏ល្បីល្បាញនៅក្នុងពិភពលោកនាឆ្នាំ (១៩៧៩) គឺ​ពេលនេះបានទទួលអនិច្ចកម្ម​ហើយ​

រូបថតស្ត្រីបីកូនក្នុងទសវត្សរ៍ឆ្នាំ១៩៧៩ ក្នុងឈុតសំលៀកបំពាក់ពណ៌ខ្មៅ បីកូនក្នុងដៃ ឈរអមដោយកូនប្រុសស្រីនៅសងខាង ក្នុងទឹកមុខស្លេកស្លាំងស្គមស្គាំង គួរអោយសង្វេគ។ រូបថតនេះ ធ្វើអោយពិភពលោកចាប់អារម្មណ៍ និងស្គាល់រូបគាត់ ជាពិសេសបានធ្វើអោយប្រជាពលរដ្ឋខ្មែរគ្រប់មជ្ឈដ្ឋានចាប់អារម្មណ៍ និងចង់ដឹងអំពីរឿងរ៉ាវរបស់គាត់។ លោកយាយ តោង អូន (ថោង អូន) កើតក្នុងឆ្នាំ ១៩៣២ (01/07/1932) ក្នុងរាជធានីភ្នំពេញ។ លោកយាយបានរៀបអាពាហ៍ពិពាហ៍ ជាមួយលោក ថោង សំ មានកូនចំនួន ៥នាក់ ប្រុស៤ ស្រី១។ ក្នុងរបបគុកឥតជញ្ជាំង ប្រល័យពូជសាសន៍ ប៉ុល ពត លោកយាយបានទទួលរងទុក្ខវេទនា ដូចជាប្រជាពលរដ្ឋខ្មែរទូទៅក្នុងសម័យនោះដែរ។ លុះដល់ដាច់ឆ្នាំ ៧៩ លោកយាយ បានភៀសខ្លួនជាមួយស្វាមី និងកូនៗ ៥នាក់ទៀត មករស់នៅប្រទេសទីបី (បារាំងសេស) ដូចមាននៅក្នុងរូបថតស្រាប់ (ស្លាប់ម្នាក់ក្នុងសម័យនោះ កូនស្រី) ។

លោកយាយ តោង អូន បានទទួលអនិច្ចកម្មនៅថ្ងៃ ១រោច ខែភទ្របទ ឆ្នាំច សំរិទ្ធិស័ក ព.ស.២៥៦២ ត្រូវនិងថ្ងៃអង្គារ៍ ទី២៥ ខែកញ្ញា ឆ្នាំ២០១៨ ដោយរោគាពាធ ក្នុងជន្មានយុ ៨៦ឆ្នាំ នៅពែរីញើ ប្រទេសបារាំង។

ក្មេងប្រុសដែលបីក្នុងដៃ ឈ្មោះ តោង សំណាង បច្ចុប្បន្នមានអាយុ ៣៩ឆ្នាំ (រស់នៅប្រទេសបារាំង)
ក្មេងស្រីដែលឈរនៅខាងឆ្វេងដៃ ឈ្មោះ តោង សុភាព បច្ចុប្បន្នមានអាយុ ៤២ឆ្នាំ (រស់នៅប្រទេសបារាំង)
ក្មេងប្រុសឈរនៅខាងស្ដាំដៃ ឈ្មោះ តោង សារឿន បច្ចុប្បន្នមានអាយុ ៤៧ឆ្នាំ (រស់នៅប្រទេសបារាំង)

ផ្ទាំថ្មចម្លាក់៖ ស្ថិតនៅរដ្ឋ ម៉ាស្សាជូសេត សហរដ្ឋអាមេរិក